रौतहट । गढीमाई नगरपालिकामा जग्गासम्बन्धी विवादमा गोली चलेको छ । नगरपालिकाको वडा नम्बर ८ स्थित धोबिनियामा जग्गा विवादमा गोली चलेको हो ।
विवादमा गोली लागेर एक जनाको मृत्यु भएको छ ।गोली लागेर स्थानीय राजकुमार राय यादवको मृत्यु भएको रौतहटका प्रमुख उपरीक्षक वीरबहादुर बुढामगरले जानकारी दिनुभएको छ ।
विवादमा गोली लागेका यादवलाई उपचारका लागि वीरगञ्ज लैजादै गर्दा बाटोमा नै मृत्यु भएको हो । प्रहरीका अनुसार गोली कसले चलायो ? भन्ने खुलेको छैन ।
गढीमाई नगरपालिकाले निर्माण गरिरहेको बाटोका विषयमा जग्गा विवाद भएको हो । विवादमा १२ बोरको बन्दुकबाट गोली प्रहार भएको प्रहरी जनाएको छ । गोली लागेर स्थानीय रामप्रताप यादव, कपिलदेव राय यादव र निरञ्जन यादव घाइते भएका छन् ।
प्रहरीले घटनामा संलग्न रहेको आशंकामा ५ जनालाई पक्राउ गरेको छ। घटनाबारे अनुसन्धान भइरहेको प्रहरीले जनाएको छ ।