साहारा लिम्बू
फुङलिङ । ताप्लेजुङको मैवाखोला गाउँपालिकाले कृषकलाई अनुदानमा चौँरी तथा याक वितरण गरेको छ । ८० प्रतिशत अनुदानमा जलजल याक चौँरी पालन कृषक समूहलाई चौँरी तथा याक वितरण गरेको हो ।
चालु आर्थिक वर्षको स्वीकृत याकचौँरी प्रबर्द्धन कार्यक्रम अन्तर्गत साम्तोङका कृषक समूहलाई चौँरी तथा याक वितरण गरिएको पालिकाका अध्यक्ष विजय प्रकाश वनेमले जानकारी दिनुभयो । उहाँका अनुसार कृषक समूहलाई १४ वटा चौँरी प्रदान गरिएको छ ।
कृषकको २० प्रतिशत साझेदारीमा चौँरी याक प्रवर्द्धनका लागि उपलब्ध गराइएको अध्यक्ष वनेमको भनाइ छ । शतप्रतिशत पालिकाको अनुदानमार्फत प्रदान गरिएको वस्तुको कृषकहरूले बेवास्ता गरेको पाइएकाले केही मात्रामा कृषकको समेत साझेदारी रहनेगरी चौँरी तथा याक प्रदान गरिएको पालिका अध्यक्षको भनाइ छ ।
चालु आर्थिक वर्षमा करिब पाँच लाख रुपियाँ बराबरको याक तथा चौँरी खरिद गरी कृषक समूहलाई हस्तान्तरण गरिएको छ । यस अभियानबाट कृषकले उत्कृष्ट प्रतिफल दिएमा आगामी आर्थिक वर्षमा थप अन्य कृषक समूहलाई समेत अनुदानमा चौँरी याक वितरण गर्ने कार्यक्रमलाई निरन्तरता दिने पालिका अध्यक्ष वनेमले बताउनुभयो ।