काठमाडौं । शंकास्पद ढंगले अमेरिका प्रवेश गरेका १० नेपाली निष्काशनमा परेका छन् । गैरकानुनी ढंगबाट अमेरिका प्रवेश गरेका उनीहरुलाई त्यहाँको अध्यागमनले निष्काशन गरेको हो । उनीहरु कहिले अमेरिका प्रवेश गरे भन्ने विषय खुलेको छैन ।
अमेरिकाको अध्यागमनले गैरकानुनी रुपमा छिरेका नेपालीहरु राजु पौडेल, प्रविन बस्नेत,पेम्बा लामा, ध्रुव कुमार र शंकर विष्ट मगरलाई निष्काशन गरेको हो। अमेरिकाको अध्यागमनले लुकीछिपी बस्दै आएका छिरिङ, शेर्पा, तेज बुढाथोकी, मोहन पौडेल, तिलक राउत र बिराज केसीलाई समेत निष्काशन गरेको छ।
उनीहरुसँग नेपालको राहदानीसमेत थिएन। अवाञ्छित ढंगले अमेरिका प्रवेश गरेको सूचना पाएपछि त्यहाँको अध्यागमनले उनीहरुलाई पक्राउ गरेको थियो। अमेरिका प्रवेश गरेपछि उनीहरुले आफ्नो राहदानी लगायतका आवश्यक कागजात फालेका थिए।
आगामी दिनमा अमेरिका प्रवेश गर्न नपाउने गरी उनीहरुलाई त्यहाँको अध्यागमनले निष्काशन गरेको हो। निष्कासित सबैलाई अमेरिकाले विमान चार्टर गरी केही दिनअघि काठमाडौं ल्याएको हो। गल्फ स्ट्रीम जहाजको भीएन ७४० एसएसको उडानबाट अमेरिकाले उनीहरुलाई काठमाडौं पठाएको हो ।