राजन रावत
हुम्ला। हिमाली जिल्ला हुम्लामा शतप्रतिशत मार्सी धान रोपाइँ कार्य सम्पन्न भएको छ। मनसुन भित्रिएसँगै रोपाइँ सकिएको हो। जिल्लाका सबै पालिकामा मार्सी धान रोपाइँ कार्य पुरा भएको कृषि विकास कार्यालयका प्रमुख चूणामणि पन्तले बताउनुभयो। खडेरीको कारण गतवर्ष भन्दा रोपाइँ कार्यमा केही ढिला भएको उहाँको भनाइ छ।
यो आर्थिक ५८५ हेक्टर जमिनमा धान रोपाइँ भएको र प्रति हेक्टर एक दशमलव १३० मेट्रिकटन उत्पादन हुने अनुमान कार्यालयले गरेको छ। हुम्लामा प्रतिहेक्टर एक दशमलव ९१ उत्पादकत्व रहेको छ। हुम्लाका सात वटा गाउँपालिका मध्य नाम्खा गाउँपालिका बाहेक सिमकोट, खार्पुनाथ, सर्केगार्ड, चङ्खेली, अदानचुली र ताँजाकोट गाउँपालिकामा मार्सी धान रोपिन्छ। जिल्लामा चङ्खेली, सर्केगार्ड, अदानचुली र ताँजाकोट गाउँपालिकामा बढी धान उत्पादन हुने गर्छ। यी गाउँपालिकामा धान खेती मुख्य बालीमा पर्छ।
सर्केगार्ड गाउँपालिका–३, उनापानी गाउँका किसान नरबहादुर फडेराले आफ्नो वडामा धान रोपाइँ कार्य पूरा भएको बताउनुभयो। सबै भन्दा धेरै मार्सी धान फल्ने चङ्खेली गाउँपालिका–२, दार्म जिउलामा पनि शतप्रतिशित रोपाइँ भएको रामभक्त जैसीको भनाइ छ। खार्पुनाथ गाउँपलिकामा समेत रोपाइँ सकिएको बबरजङ्ग हमालले बताउनुभयो।