काठमाडौं । चालु आर्थिक वर्ष २०८२/८३ का पहिलो चार महिनामै नेपालले १० अर्ब रुपैयाँभन्दा बढीको धान–चामल आयात गरेको छ। भन्सार विभागका अनुसार साउनदेखि कात्तिकसम्म मुलुकले कुल १० अर्ब १८ करोड ४९ लाख ९० हजार रुपैयाँ बराबरको धान र चामल आयात गरेको हो। यो अघिल्लो वर्षको सोही अवधिको तुलनामा झण्डै ३ अर्ब रुपैयाँले बढी हो।
गत वर्ष यही अवधिमा ६ अर्ब ९६ करोड ६७ लाख रुपैयाँ बराबरको मात्र धान–चामल आयात भएको थियो। स्थानीय उत्पादनले आवश्यक माग पूरा गर्न नसक्नु र उपभोग शैलीमा आएको परिवर्तनले आयात बढ्दै गएको विभागको भनाइ छ।
यस वर्षका चार महिनामा मात्रै ८ करोड ८२ लाख २७ हजार ९१३ किलो चामल आयात भएको छ, जसको मूल्य ६ अर्ब ५८ करोड ५८ लाख रुपैयाँभन्दा बढी छ। त्यस्तै, ९ करोड ६९ लाख १७ हजार २१ किलो धान आयात गरियो, जसको मूल्य ३ अर्ब ५९ करोड १७ लाख रुपैयाँ बराबर पर्छ।
अघिल्लो वर्षको तुलनामा यस वर्ष चामल र धान दुवैको आयात परिमाणमा उल्लेख्य वृद्धि भएको विभागले जनाएको छ। गत वर्ष यति अवधिमा ४ करोड ६२ लाख ५८ हजार किलो चामल र ७ करोड १३ लाख १९ हजार किलो धान आयात गरिएको थियो।
बैमौसमी वर्षा, बाढी–पहिरोलगायतका कारण यस वर्ष धान उत्पादन घट्ने अनुमान गरिएको छ, जसले आयात अझ बढ्ने संकेत देखिन्छ। भारत, चीन, थाइल्यान्ड, इटाली, इन्डोनेसिया र भियतनामलगायत देश नेपालका प्रमुख धान–चामल आपूर्तिकर्ता रहेका छन्।