काठमाडौं । नेपाल सरकारले चीनसँग नजिकको सहकार्यमार्फत लगानी प्रवर्धन गर्न तयार रहेको संकेत दिएको छ। नेपाली उद्योगपति, व्यवसायिक प्रतिनिधि र चिनियाँ उद्यमीबीच राजधानीमा सम्पन्न नेपाल–चीन लगानी गोष्ठीमा नेपाललाई आकर्षक लगानी गन्तव्यका रूपमा प्रस्तुत गरिएको थियो।
कार्यक्रमका प्रमुख अतिथि अर्थमन्त्री रामेश्वर खनालले विश्व अर्थतन्त्रअनुसार नेपालले आर्थिक सुधारको प्रक्रिया अघि बढाइरहेको र स्वदेशी तथा विदेशी लगानीका लागि अनुकूल वातावरण तयार रहेको बताए। उनले विभिन्न क्षेत्रहरूमा लगानी प्रवर्धनका लागि चीनसँग सहकार्य बढाउन नेपाल इच्छुक रहेको पनि उल्लेख गरे।
नेपालका लागि चीनका राजदूत सोङले दुई देशबीच दीर्घकालीन मित्रवत् सम्बन्ध कायम रहेको र औद्योगिक विकास, ऊर्जा स्रोत, प्रविधि, पूर्वाधार निर्माण सामग्री तथा औषधि उत्पादन उद्योगमा सहकार्य विस्तार गर्न चीन इच्छुक रहेको बताए।
नेपाल चेम्बर अफ कमर्सका पूर्व अध्यक्ष राजेन्द्र मल्लले भने, “लगानी सुरक्षित र सुनिश्चित प्रतिफलका लागि नेपालले नीतिगत संरचना तयार गरिसकेको छ। प्राकृतिक स्रोतसाधन, भौगोलिक अवस्थिति र ऊर्जाशील युवा जनशक्ति नेपालमा लगानीका लागि अनुकूल छन्।”
लगानी बोर्डका प्रमुख कार्यकारी अधिकृत सुशील ज्ञवाली, नेपालस्थित चिनियाँ दूतावासका इकोनोमिक काउन्सिलर चु फङलगायतले पनि लगानीका लागि नेपाल उपयुक्त गन्तव्य भएको बताउँदै विस्तृत प्रस्तुति प्रस्तुत गरे।
गोष्ठीमा नेपालस्थित चिनियाँ उद्योग तथा वाणिज्य महासंघका अध्यक्ष फान सियाओबोको अध्यक्षतामा लगानीका अवसर र सम्भावनाबारे विस्तृत छलफल भएको थियो।