एजेन्सी । श्रीलंकामा ‘दितवा’ नामक भिषण तूफानका कारण आएको बाढी–पहिरोले ठूलो क्षति पुर्यायो। राष्ट्रपति अनुरा कुमारा दिशानायकेले आपतकाल घोषणा गर्दै अन्तर्राष्ट्रिय समुदायसँग सहयोगको अपील गरेका छन्।
सरकारी विवरण अनुसार, बाढी–पहिरोबाट कम्तिमा १३२ जनाको मृत्यु भएको छ भने १७६ जना बेपत्ता छन्। विदेशमा रहेका श्रीलंकाली नागरिकहरूलाई सरकारले स्वदेशमा पैसा पठाउन आह्वान गरेको छ।
श्रीलंकामा पछिल्लो आठ वर्षमा आएको यो सबैभन्दा ठूलो प्राकृतिक विपत्ति मानिएको छ। आठ वर्षअघि २०१७ मा आएको बाढी–पहिरोमा २०० जनाको मृत्यु भएको थियो भने लाखौं मानिस बेघर भएका थिए।
विपद् व्यवस्थापन विभागका अनुसार, यसपटक १५ हजारभन्दा बढी घर नष्ट भएका छन् र ७८ हजार मानिसलाई सरकारी अस्थायी शिविरमा राखिएको छ।