जेनेभा । संयुक्त राष्ट्रसंघका मानव अधिकार विज्ञहरूले गाजाको दक्षिणी क्षेत्रमा सहायता लिन गएका सर्वसाधारणमाथि भएको आक्रमण र जबरजस्ती बेपत्ता पारिएका घटनाप्रति गम्भीर चिन्ता व्यक्त गरेका छन्। उनीहरूले यस्तो कार्यलाई ‘निर्दयी र अमानवीय अपराध’ भन्दै तत्काल अन्त्य गर्न माग गरेका छन्।
सात जना स्वतन्त्र विज्ञहरूले संयुक्त वक्तव्य जारी गर्दै भनेका छन्, “आफ्नो आधारभूत अधिकार– भोजनको खोजीमा निस्केका सर्वसाधारणलाई लक्षित गरी बेपत्ता पारिएको समाचार केवल दुःखद मात्र होइन, यो यातनासँग बराबरको अपराध हो।”
विज्ञहरूको अनुसार, गाजामा खाद्य वितरणमा संलग्न गाजा मानवीय प्रतिष्ठानका वितरण केन्द्रहरूबाट एक बालकसहित कैयौं व्यक्तिहरू हराएको खबर आएको छ। उनीहरूको भनाइमा, इजरायली सैनिकहरू नै सहायता लिन आएका व्यक्तिहरूलाई जबरजस्ती बेपत्ता पार्ने कार्यमा संलग्न छन्, तर हिरासतमा लिएका व्यक्तिहरूबारे कुनै जानकारी दिइएको छैन, जसलाई अन्तर्राष्ट्रिय कानुनको उल्लंघन मानिन्छ।
संयुक्त राष्ट्रसंघले गत साता नै गाजाको प्रमुख क्षेत्रमा भोकमरी घोषणा गर्दै मानवीय सहायता आपूर्तिमा भएको व्यवस्थित अवरोधलाई दोषी ठहर गरेको थियो। इजरायलले मार्चदेखि मेसम्म गाजामा पूर्ण नाकाबन्दी गरेपछि अमेरिकाको सहयोगमा स्थापना गरिएको गाजा मानवीय प्रतिष्ठानमार्फत खाद्य वितरण हुँदै आएको छ। तर हवाई आक्रमण र गोलीबारीका कारण सयौं सर्वसाधारणको ज्यान गइसकेको छ।
संयुक्त राष्ट्रसंघको मानव अधिकार कार्यालयका अनुसार गत मे महिनाको अन्त्यदेखि अहिलेसम्म एक हजार ८५७ जना फिलिस्तीनी सहायता खोज्दा मारिएका छन्, जसमध्ये एक हजारभन्दा बढी गाजा मानवीय प्रतिष्ठानका नजिकै ज्यान गुमाएका हुन्।
विज्ञहरूले चेतावनी दिँदै भनेका छन्, “अहिले सहायता खोज्न जाने व्यक्तिहरू अझ ठूलो जोखिममा परेका छन्।” उनीहरूले इजरायल सरकारलाई तुरुन्तै यस्तो अपराध रोक्न, बेपत्ता पारिएका व्यक्तिहरूको अवस्थाबारे स्पष्ट जानकारी दिन र दोषीमाथि कानुनी कारबाही गर्न आग्रह गरेका छन्।