काठमाडौं । नेपालमा हालैका विध्वंसकारी घटनाबाट ध्वस्त भएका ऐतिहासिक संरचनाहरू पुनःनिर्माणका लागि बेइजिङस्थित नेपाली राजदूतावासले चीन र त्यहाँ रहेका नेपाली समुदायसँग सहयोगको आह्वान गरेको छ।
राजदूतावासले शुक्रबार जारी गरेको सूचनामा चीनमा रहेका नेपाली नागरिक, गैरआवासीय नेपालीहरू (एनआरएन) र चिनियाँ नागरिकलाई नेपालको ‘भौतिक पूर्वाधार पुनःनिर्माण कोष’मा आर्थिक सहयोग गर्न आग्रह गरेको हो। सूचनामा भनिएको छ, “बेइजिङस्थित नेपाली दूतावास आफ्ना नागरिकहरू, गैरआवासीय नेपाली समुदाय, चिनियाँ समुदाय र अन्तर्राष्ट्रिय समुदायलाई नेपालको पुनःनिर्माण अभियानमा सहभागी हुन हार्दिक अपिल गर्दछ।”
सहयोगका लागि राजदूतावासले राष्ट्रिय वाणिज्य बैंकमा रहेको खाता नम्बर १९६०१००१०२०७०००४ र क्युआर कोडसमेत सार्वजनिक गरेको छ।
गत भदौ २३ र २४ गतेका ‘जेन–जी’ प्रदर्शन र त्यसपछिका तोडफोड घटनामा सिंहदरबार, सर्वोच्च अदालत, संसद् भवनलगायत सयौँ सरकारी कार्यालयहरू ध्वस्त भएका थिए। ती संरचनाको पुनःनिर्माणका लागि ठूलो रकम आवश्यक परेकाले सरकारले ‘भौतिक पूर्वाधार पुनःनिर्माण कोष’ स्थापना गरेको हो।