काठमाडौं । नेकपा (एकीकृत समाजवादी)का अध्यक्ष माधवकुमार नेपालले एमाले अध्यक्ष केपी शर्मा ओलीलाई लक्षित गर्दै कम्युनिष्ट आन्दोलनमा अधिनायकवाद मौलाएको आरोप लगाएका छन् ।
शुक्रबार काठमाडौंमा पार्टीको ७ नम्बर क्षेत्रीय कमिटीले आयोजना गरेको अन्तर्क्रिया कार्यक्रममा बोल्दै अध्यक्ष नेपालले एमालेभित्र रहेका कार्यकर्ताहरू “गहभरी आँसु बोकेर कहाँ झार्ने भनेर ठाउँ खोज्दै हिँड्नुपरेको” कठोर टिप्पणी गरे ।
उनले २०७४ सालको निर्वाचनमा दुईतिहाइ बहुमत पाएको एमाले नेतृत्वले संविधान संशोधन र आवश्यक कानून निर्माणमा ध्यान नदिएको मुख्य दोष ओलीकै भएको दाबी गरे । नेपालका अनुसार, कम्युनिष्ट आन्दोलनमा अहिले देखिएको खतरनाक अधिनायकवादी प्रवृत्तिले पार्टीभित्र असन्तोष चुलिएको छ ।
पूर्वप्रधानमन्त्री नेपालले एमाले नेतृत्व पूर्व सहकर्मीहरूमाथि बदला लिने उद्देश्यमा लागेको भन्दै अब उपेन्द्र यादव र प्रभु साहमाथि समेत ‘प्रहार’ सुरू भएको टिप्पणी गरे । “अब प्रचण्डमाथि पनि बदला सुरू हुनेछ, कोही बाँकी रहनेवाला छैनन्,” उनले चेतावनी दिए ।
नेपालले कार्यकर्ताको पहिलो जिम्मेवारी समाज रूपान्तरण गर्ने भए पनि एमाले नेतृत्व त्यस दिशामा जान नसकेको आरोप लगाउँदै अधिनायकवादले पार्टीलाई संकटमा पारेको निष्कर्ष निकाले ।