काठमाडौं । प्रधानमन्त्री केपी शर्मा ओली शनिबार बिहान ७ बजे हिमालयन एयरलाइन्सको चार्टर्ड उडानमार्फत चीन प्रस्थान गर्दैछन् । उनी तियानजिनमा हुने शाङ्घाई सहयोग संगठन (एससीओ) शिखर सम्मेलनमा सहभागी हुने कार्यक्रमका लागि चीन जान लागेका हुन् ।
परराष्ट्र मन्त्रालयका अनुसार प्रधानमन्त्री ओलीको नेतृत्वमा चीन जाने नेपाली प्रतिनिधिमण्डलमा २३ सदस्य छन् । सो टोलीमा उनकी श्रीमती राधिका शाक्य, पूर्वउपप्रधानमन्त्री पूर्णबहादुर खड्का, शिक्षा मन्त्री रघुजी पन्त, संस्कृति तथा पर्यटन मन्त्री बद्रीप्रसाद पाण्डे, प्रधानमन्त्रीका आर्थिक सल्लाहकार डा. युवराज खतिवडा, पूर्वमन्त्री छविलाल विश्वकर्मासहित सरकारका उच्चपदस्थ अधिकारीहरू सहभागी छन् ।
भदौ १४ देखि १८ गतेसम्म हुने पाँचदिने भ्रमणका क्रममा प्रधानमन्त्री ओलीले चीन र रुसका राष्ट्रपतिसहित ६ देशका सरकार प्रमुखसँग द्विपक्षीय भेटवार्ता गर्नेछन् । उनले भदौ १६ गते तियानजिनमा हुने ‘एससीओ प्लस’ शिखर सम्मेलनलाई सम्बोधन गर्ने र भदौ १७ गते बेइजिङमा चीनका उपराष्ट्रपति हान झेङसँग भेट्ने कार्यक्रम छ ।
प्रधानमन्त्री ओलीले भदौ १८ गते बेइजिङमा आयोजना हुने चिनियाँ जनताको जापानी आक्रमणविरुद्धको प्रतिरोध युद्ध र विश्व फासिस्ट विरोधी युद्धको विजयको ८०औँ वार्षिकोत्सवमा पनि सहभागिता जनाउनेछन् ।
भारत र चीनबीच हालै लिपुलेक हुँदै व्यापार पुनः सुरु गर्ने सहमति भएपछि नेपालमा तीव्र आलोचना भएको छ । यसैबीच प्रतिनिधिसभाका सांसदहरूले प्रधानमन्त्रीलाई चीन भ्रमणका क्रममा लिपुलेकको विषय भारतीय प्रधानमन्त्री नरेन्द्र मोदी र चिनियाँ राष्ट्रपति सी चिनफिङसँग उठाउन आग्रह गरेका थिए । प्रधानमन्त्री ओलीले पनि पत्रकारहरूसँग कुरा गर्दै यो विषय उच्चस्तरीय भेटमा उठाउने प्रतिबद्धता जनाएका छन् ।
प्रधानमन्त्री ओली भदौ १८ गते राति १०:३० बजे स्वदेश फर्कने कार्यक्रम रहेको परराष्ट्र मन्त्रालयले जनाएको छ ।