काठमाडौं । पूर्वप्रधानमन्त्री एवम् नेकपा (एकीकृत समाजवादी)का सम्मानित नेता झलनाथ खनालले काठमाडौंमा पहिलोपटक आयोजना गरिएको सार्क शिक्षा सम्मेलन र तेस्रो संस्करणको सार्क शिक्षा पुरस्कारलाई शिक्षा क्षेत्रमा ऐतिहासिक उपलब्धि भएको बताउनु भएको छ ।
शनिबार बुढानिलकण्ठस्थित लेमन ट्री प्रिमियरमा शिक्षालय राष्ट्रिय मासिक पत्रिकाद्वारा आयोजित कार्यक्रममा प्रमुख अतिथिका रूपमा सम्बोधन गर्दै खनालले यस सम्मेलनले सार्क राष्ट्रबीचको शैक्षिक अभ्यास, उत्कृष्टता र अनुभव आदानप्रदानमा टेवा पुर्याउने विश्वास व्यक्त गर्नुभएको छ ।
सम्मेलनको मुख्य उद्देश्य नवप्रवर्तन, समानता र आजीवन शिक्षालाई साझा मंचमा ल्याई भविष्यको शिक्षालाई पुनःपरिकल्पना गर्नु रहेको शिक्षालयका अध्यक्ष श्याम तण्डुकारले जानकारी दिनुभयो । उहाका अनुसार सहकार्य र सांस्कृतिक आदानप्रदानमार्फत सम्मेलनले सार्क राष्ट्रबीच आपसी सम्बन्ध सुदृढ गर्दै शैक्षिक विकासमा योगदान गर्नेछ ।
कार्यक्रममा प्रमुख वक्ता प्रा. डा. विद्यनाथ कोइराला र भारतका डा. धीरज मलहोत्राले “न्युरो–लिङ्ग्विस्टिक प्रोग्रामिङ (NLP), नवप्रवर्तन, समानता र आजीवन शिक्षा” विषयमा विचार प्रस्तुत गरे । साथै, प्यानल छलफल, कार्यशाला, सांस्कृतिक प्रस्तुति र शैक्षिक संस्थानहरूको भ्रमणजस्ता सत्रहरू पनि सञ्चालन भए ।
सो अवसरमा नेपाल, भारत, बंगलादेशलगायतका शिक्षा क्षेत्रका ब्याक्तित्व साथै विद्यालयहरूलाई सार्क शिक्षा सेवा लगायतका पुरस्कार प्रदान गरिएको थियो । गोदावरी नगरपालिकाले समेत विशेष विधामा पुरस्कार प्राप्त गरेको छ ।
सम्मेलनमा बंगलादेश, भारत, नेपाल, श्रीलंका, भुटान र पाकिस्तानका करिब ३५ प्रतिनिधिसहित झन्डै १०० जना शैक्षिक उद्यमीहरूको सहभागिता रहेको आयोजकले जनाएको छ ।