काठमाडौं । नेकपा (माओवादी केन्द्र), नेकपा (एकीकृत समाजवादी), जनता समाजवादी पार्टीसहित करिब डेढ दर्जन वामपन्थी शक्तिहरूबीच सम्पन्न ऐतिहासिक एकताको घोषणापछि यूएईस्थित दुई प्रमुख प्रवासी संगठन, प्रवासी नेपाली एकता मञ्च र नेपाली जनप्रगतिशील मञ्च, युएईले संयुक्त रूपमा स्वागत तथा समर्थन व्यक्त गरेका छन्।
दुवै संगठनका अध्यक्ष , प्रवासी नेपाली एकता मन्चका विपिन सापकोटा र नेपाली जनप्रगतिशील मन्च, युएईका लक्ष्मण खनालद्वारा जारी विज्ञप्तिमा यो एकतालाई साधारण दलगत समायोजन नभई दीर्घकालीन राष्ट्रिय रूपान्तरण, सामाजिक न्याय, आर्थिक समृद्धि र वैज्ञानिक समाजवादतर्फ उन्मुख निर्णायक कदमका रूपमा व्याख्या गरिएको छ।
एकताले वाम आन्दोलनमा विगतमा देखिएका विभाजन, अविश्वास र विचलनलाई समापन गर्दै श्रमिक जनताको हितमा परिवर्तनकारी हस्तक्षेपलाई सबल बनाउने यो चरण ऐतिहासिक कोसढुङ्गा हुने विश्वास व्यक्त गरिएको छ।
संगठनहरूले प्रवासी भूमिमा रहेका चेतनाशील तथा प्रगतिशील नेपालीहरूलाई नवगठित पार्टीलाई सबल, गतिशील र संगठनात्मक रूपमा सक्षम बनाउन गोलबद्ध रूपमा अघि बढ्न आह्वानसमेत गरेका छन्।
विज्ञप्ति (जस्ताको तस्तै) :
‘देशभक्त बामपन्थी तथा प्रगतिशीलशक्तिकाबीच लामो समयदेखि बहस हुँदै आएको एकताको ऐतिहासिक आवश्यकता, जनआकांक्षा र राष्ट्रिय रुपान्तरणको बाध्यकारी परिस्थितिलाई आत्मसात गर्दै नेकपा (माओवादी केन्द्र), नेकपा (एकीकृत समाजवादी), जनता समाजवादी पार्टी सहित विभिन्न बैचारिक आधार र संगठनात्मक संरचनामा क्रियाशील करिब डेढ दर्जन बामपंथी शक्तिहरूबीच सम्पन्न ऐतिहासिक एकता मार्फत नवगठित नेपाली कम्युनिष्ट पार्टी (नेकपा) को घोषणालाई हार्दिक स्वागत गर्दछौं।
यो एकता विभिन्न दलहरुको साधारण समायोजन मात्र नभएर दीर्घकालीन राष्ट्रिय रूपान्तरण, सामाजिक न्याय, आर्थिक समृद्धि, सर्वहारा बर्गको मुक्ति र वैज्ञानिक समाजवादको लक्ष्यतर्फ उन्मुख एकीकृत क्रान्तिकारी कदम एवम् संस्थागत प्रतिवद्धताको दृढ अभिव्यक्ति हो । वाम आन्दोलनमा विगतमा उत्पन्न विभाजन, अविश्वास,अवसरवाद र विचलनबाट सिर्जित चुनौतीलाई एतिहासिक रुपमा सम्बोधन गर्दै श्रमिक ,किसान, मजदुर तथा आम उत्पीडित , विपन्नवर्ग, अविछिन्नता र विश्वबन्दुत्व तथा प्रगतिशीलताले ऐतिहासिकरूपमा न्यायोचित गर्दै, श्रमिक, किसान, मजदुर तथा आम उत्पीडित वर्गको हितमा परिवर्तनकारी राजनीतिक हस्तक्षेपलाई सबल बनाउन यो एकता महत्त्वपूर्ण कोसढुङ्गा हुने हाम्रो पुर्ण विश्वास छ ।
प्रवासी भूमिमा रहेर प्रवासी नेपाली समुदायका हक–अधिकारको संरक्षण, नेपालको राजनीतिक स्थिरता , आर्थिक मार्गपरिवर्तन र समाज रूपान्तरणको अभियानमा निरन्तर योगदान दिदै आएका हामी नेपाली जनप्रगतिशील मञ्च युएई र प्रवासी नेपाली एकता मन्च युएई यस ऐतिहासिक एकतालाई राष्ट्रिय हित, जनजनको आकांक्षा र वाम आन्दोलनको रणनीतिक अपरिहार्यताका आधारमा पूर्ण समर्थन र ऐक्यवद्धता जाहेर गर्दछौं।
साथै, विश्वभर छरिएर रहेका चेतनाशील, प्रगतिशील, वर्गीय चेतनाद्वारा लैस तथा परिवर्तनकामी सम्पूर्ण प्रवासी नेपालीहरूलाई नवगठित नेपाली कम्युनिष्ट पार्टीको ऐतिहासिक यात्रालाई सबल, गतिशील र संगठात्मक रूपमा सक्षम बनाउन गोलबद्ध हुँदै अघि बढ्न हार्दिक आव्हान समेत गर्दछौं । ऐतिहासिक जिम्मेवारी पूरा गराउन अपील गर्दछौ।
हामी दुबै मञ्चहरुको तर्फबाट संगठित वाम राजनीतिको बैचारीक उचाई संगठनात्मक घनत्व , जनआकांक्षा र वर्गीय हितलाई सर्वोपरि ठान्दै नयाँ उचाईमा पुर्याउने आगामी अभियानमा पूर्ण समर्पण, प्रतिबद्धता र ऐक्यवद्धता समेत जाहेर गर्दछाैं।’
