काठमाडौं । यूएईमा जारी युनिटी कप टी–२० शृङ्खलामा नेपालले वेस्ट इन्डिजलाई लगातार दोस्रो खेलमा पराजित गर्दै शृङ्खला एक खेल अगावै जितेको छ। नेपाली क्रिकेटका लागि यो जित इतिहासमै दर्ज हुने गौरवपूर्ण क्षण हो।
नेपालले दिएको १७४ रनको चुनौती पछ्याउन उद्यत वेस्ट इन्डिज १७.१ ओभरमा ८३ रनमा अलआउट भयो र नेपालले ९० रनको फराकिलो अन्तरले विजय हात पार्यो। वेस्ट इन्डिजका लागि जेसन होल्डरले सर्वाधिक २१ रन बनाउन सके, तर टोलीले कुनै पनि क्षणमा खेल नियन्त्रणमा लिन सकिन।
नेपालका आदिल आलमले ४ ओभरमा २४ रन खर्चेर ४ विकेट लिए भने कुशल भुर्तेलले ३ विकेट लिए। ललित राजवंशी र दीपेन्द्रसिंह ऐरीले १/१ विकेट लिए। यसअघि टस जितेर पहिले ब्याटिङ गरेको नेपालले २० ओभरमा ६ विकेट गुमाएर १७३ रन बनाएको थियो।
नेपालका ओपनर आसिफ शेखले ४७ बलमा ६८ रन अविजित खेले भने सन्दीप जोरा ३९ बलमा ६३ रन बनाए। विशेष कुरा के छ भने ४३(३) को स्थितिबाट सुरु भएको चौथो विकेटको साझेदारीमा आसिफ र जोरा मिलेर १०० रन जोडेर टोलीलाई बलियो स्थितिमा पुर्याए। वेस्ट इन्डिजका लागि कप्तान अकिल होसेनले ४ ओभरमा २१ रन खर्चेर २ विकेट लिए भने काइल मेयर्सले २ ओभरमा २६ रन खर्चेर २ विकेट लिए। जेदिया ब्लेड्सले १ विकेट लिए।
यसअघि पहिलो खेलमा पनि नेपालले वेस्ट इन्डिजमाथि ऐतिहासिक जीत हासिल गरेको थियो। लगातार दुई खेलको जितपछि नेपालले टेस्ट राष्ट्रविरुद्ध टी–२० शृङ्खलामा ऐतिहासिक सफलता दर्ता गराएको छ। यो विजय नेपाली क्रिकेटको लागि मात्र नभई सम्पूर्ण खेलप्रेमीहरूको लागि गर्वको क्षण हो।
नेपालले निरन्तर प्रदर्शन गर्दै अन्तर्राष्ट्रिय क्रिकेटमा आफ्नो उपस्थिति मजबुत बनाएको छ र आगामी खेलमा पनि टिमको आत्मविश्वास उच्च रह्ने देखिन्छ।