बाँके । राप्तीसोनारी गाउँपालिकामा कारोबार हिनामिना आरोपमा सामुदायिक अध्यक्षसहित ८ जना पक्राउ परेका छन् । गाउँपालिका वडा नम्बर ५ विनौनास्थित सामुदायिक वन उपभोक्ता समितिका अध्यक्ष भोला थारुसहित ८ जनालाई प्रहरीले पक्राउ गरेको हो ।
पक्राउ परेका सामुदायिक वनका अध्यक्ष थारुसहित ८ जनालाई घाटगद्दीमा रहेको ५२ लाख बराबरको काठ हिनामिना गरेको आरोप लागेको छ । स्थानीयले उजुरी गरेपछि उनीहरु पक्राउ हुन् । जिल्ला वन कार्यालय, बाँकेका सहायक वन अधिकृत गणेश खड्काका अनुसार सयम भवानी सामुदायिक वन उपभोक्ता समितिका सचिव आरती वैश्य, कोषाध्यक्ष मैयासरी थारु, सदस्य कमला केसी, मानबहादुर विक, रामकली थारु, खडगबहादुर ओली र शिवकुमारी थारुलाई वन कार्यालयको हिरासतमा राखिएको छ ।
आठै जनामाथि घाटगद्दीमा राखेको काठ, दाउरा हिनामिना गरेको अभियोगमा मुद्दा चलाइने भएको छ । “काठ, दाउरा बेचेको हिसाब पनि छैन । खातामा समेत पैसा देखिँदैन”, अधिकृत खड्काले भन्नुभयो ।
साल, अस्ना, कर्मा, जामुन, शिरिषलगायत जातका काठका गोलिया बेचबिखन गरेको वन कार्यालयले जनाएको छ । उनीहरुलाई जिल्ला अदालत, बाँकेबाट अनुमति लिएर प्रहरीले पक्राउ गरी वन कार्यालयलाई बुझाएको हो ।