कपिलवस्तु । नेकपा एमालेका अध्यक्ष केपी शर्मा ओलीले एमाले एक्लैले ५१ प्रतिशत बहुमत सिट जित्ने गरी पार्टीले ‘मिसन ग्रासरूट’ अभियान संचालन गरेकाे बताउनुभयो।
मिसन ग्रासरुट अभियान अन्तर्गत एमाले कपिलवस्तु जिल्लाको आयोजनामा सम्पन्न भएको अगुवा कार्यकर्ता भेला तथा प्रशिक्षण कार्यक्रमलाई सम्बोधन गर्दै उहाँले यस्ताे बताउनुभएकाे हाे । एमालेप्रति चौतर्फी घेराबन्दी भएको बताउँदै उहाँले आफूहरुबिना हतियारको एउटा ठूलो लडाई लडिरहेको बताउनुभयाे । यो लडाई समृद्धि र विकासका लागि लडिएको लडाई भएकाे उहाँकाे तर्क छ ।
उहाँले भन्नुभयो,– ‘किताब र काजगमा लेखेको अधिकार दिएर होइन व्यवहारमा अधिकार नागरिकलाई हामी दिन चाहान्छौँ ।’ सामाजिक न्याय – समानतासहितको समाज, विकास, समृद्धि हासिल गरिएको समाज, विकास र समृद्धिसहितको समाज निमार्ण गर्न चाहेको उहाँकाे भनाइ थियाे ।
उहाँले आफू प्रधानमन्त्री हुँदा बनेको एमाले सरकारको ध्यान देशको विकासका लागि खर्च भएको पनि बताउनुभयाे । अध्यक्ष ओलीले सरकारका तर्फबाट कपिलवस्तुको तौलिहवादेखि कृष्णनगर जाने सडक एक लेनको बन्दै गरेको र त्यसलाई रोकेर २ लेनको बनाउन भनेको पनि बताउनुभयो ।
उहाँले नागरिकलाई समान अधिकार र सामाजिक न्यायसहितको समानता चाहेको बताउनुभयाे । समाजलाई सदाचारयुक्त, शुसासनयुक्त समाज निमार्ण गर्दै देशको स्वाधिनता, स्वतन्त्रता, भूमिको रक्षा गर्न, देशको स्वाभिमान, गौरव बढाउन र बलियो राष्ट्र बनाउन नेपाली जनताको पार्टी एमालेको बलियो संगठन आवश्यक रहेको समेत उहाँकाे भनाइ थियाे ।