सत्तागठबन्धनसँग ओलीलाई डर: मिलेर जाउँ भन्दै माधव र प्रचण्डलाई फोन

काठमाडौं । नेकपा एमालेका अध्यक्ष केपी ओली ५ दलीय सत्तागठबन्धनले स्थानीय चुनावमा जाने सहमति गरेपछि नेकपा एकीकृत समाजवादीका अध्यक्ष माधव कुमार नेपाल र माओवादी केन्द्रका अध्यक्ष पुष्पकमल दाहाललाई फकाउन थालेका छन् ।

सत्ता गठबन्धन चुनावमा मिलेर जाने चर्चा चलिरहँदा कम्युनिस्टहरु चुनावमा तालमेलको तयारीमा भित्र भित्र लागेका छन् । मुख्य कम्युनिस्ट दलहरुको दोस्रो र तेस्रो तहका नेताहरुले सहमतिको प्रयास गरिरहँदा शिर्ष नेताहरुबीच नै कुराकानी हुन थालेको छ ।
माओवादी अध्यक्ष प्रचण्डले १७ चैत्रमा सत्ता गठबन्धनको बैठकमा एमाले अध्यक्ष केपी शर्मा ओलीसँग मिलेर जाने वाध्यात्मक अवस्था आउनसक्ने बताएका थिए । आफ्ना दलका नेताहरु एमाले नेताहरुसँग भित्र भित्र वार्ता गरिरहेको उल्लेख गर्दै आफू दबाबमा परिसकेको खुलाएका थिए । यसलाई प्रचण्डको बार्गेनिङको रुपमा हेरिएको थियो । तर, प्रचण्डले खुलासा गरेको भोलिपल्टै नयाँ खुलासा भएको छ ।

एमाले अध्यक्ष केपी शर्मा ओली स्वयं प्रचण्डसँग संवाद गर्न थालेका छन् । दुई नेताहरुबीच टेलिफोन र विश्वासपात्रहरुमार्फत् छलफल अगाडि बढेको हो । यी छलफलहरु चुनावी तालमेलमा केन्द्रित रहेको बुझिएको छ ।

प्रचण्डसँग मात्र नभई ओलीले नेकपा एकीकृत समाजवादीका अध्यक्ष माधवकुमार नेपालसँग पनि टेलिफोन संवाद गरेको खुलेको छ । ओलीले माधव नेपाललाई मिलेर जान प्रस्ताव गरेको बुझिएको छ । ओलीले आफू लचिलो हुने सम्मको प्रस्ताव गरेको खुलेको छ ।

Leave a Reply

Your email address will not be published. Required fields are marked *

Contact Us