मदन दुलाल
[ विषाद…. विस्मय…. चिच्याहट]
….. असह्य चित्कार
…… आर्तनाद
कोष्ठकमा हिंसा/प्रतिहिंसा
[ संक्षिप्त पूर्व कथा ]
————————————
निश्तब्ध अकाशगंगाबाट
[ निस्सार साररहित सन्नटा ] – को व्यप्तता चिर्दै
अचानक विस्फोटक आवाज आउँछ
र भन्छ
विद्रोह बोल् द्रौपदी ! बिद्रोह
किन गिडगिडाउँछेस्
मृत प्रायः
संवेदनाविहीन गिडहरूको सम्मुख हँ ?
तैँले छैन कदापि छैन गिडगिडाउनु-
यो बुझ्
र
उठ्,
जाग् र समा बन्दुक र भिर धारिला धार
बोल् विद्रोही आवाज
फूलनदेवीले जस्तै
अनि
छिनाइदे वीर्य मुछेल भद्दा लिङ्गादी सोचहरूको
ठाडो अक्करे अहङ्कार
———————————-
[ तप् ….तप्…. तप्
तप्कियोस् रक्त ….. ]
[ बुरुक्क बुरुक्क उफ्रियोस् गिड ]
र
छाओस् निस्तब्धता सम्पूर्ण सम्पूर्णमा
यो
ख्याल गर्
तमिस्रको प्रियतमा
[ भद्दा अन्धकार ]- हो*
[ रौरवमा रुरुको ताण्डव स्वीकार्य छ] – कृष्णे
स्वीकार्य छ