काठमाडौं । पूर्व उपप्रधानमन्त्री तथा नेकपा एमालेका वरिष्ठ उपाध्यक्ष ईश्वर पोखरेलले ‘मेरो चरित्रहत्या भयो’ प्रेस काउन्सिल नेपालमा उजुरी दिनुभएको छ ।
एमालेका वरिष्ठ उपाध्यक्ष पोखरेलले रातो पाटी अनलाइनमा आफूविरुद्ध प्रकाशित समाचारको विषयलाई लिएर प्रेस काउन्सिलमा शु्क्रबार उजुरी दिनुभएको हो । एमालेका वरिष्ठ उपाध्यक्ष पोखरेलको तर्फबाट स्वकीय सचिव ध्रुवप्रसाद खतिवडाले काउन्सिलमा उजुरी दिनुभएको हो ।
रातो पाटीले वैशाख २८ गते ‘निर्वाचन आयोगको गाडीमा एमाले नेता ईश्वर पोखरेलको रजाइँ, सरकारी गाडीमा निजी नम्बर प्लेट प्रयोग’ शीर्षकमा समाचार प्रकाशित गरेको थियो । एमाले नेता पोखरेलले आफूले अहिले नेकपा एमालेले वरिष्ठ उपाध्यक्षको लागि भनेर उपलब्ध गराएको बा १२ च ५२११ नम्बर गाडी चढिरहेको तर रातो पार्टी’ले सत्यतथ्य नबुझी चरित्रहत्या गर्ने उदेश्यले झुठो समाचार प्रकाशित गरेको बताउनुभएको छ ।