अनिश खतिवडा, भक्तपुर ।
कथामा प्रेमको मिठो सुवास थियो,
होइन यो त गन्ध हो भन्दै नाक खुम्च्याउनेको भिडभाड थियो।
त्यो दिन थियो कि रात थियो,
अल्मलियो बालक त्यो विचरा जो झमक्क साँझमा निद्राबाट ब्युँझिएको थियो।
उ आन्दोलनकारी थियो कि तमाशावाल
हुटहुटीमा आन्दोलनमा जानेहरू, शहीदको सुचीको सुरुवातमा थियो।
त्यो घोडा थियो कि गधा थियो,
खच्चर पनि त हुन्छ एक जन्तु भन्ने ज्ञानको उनीहरूमा कमी थियो।
उ चोर थियो कि नेता थियो,
कुनै दिन आफैले समातेको एक फटाहालाई, आफैले सल्यूट हान्नु पर्ने प्रहरीको बाध्यता थियो।
उ लडेको हो कि लडाईंएको हो,
बैशाखी टेक्ने मान्छेलाई हिलोको बाटो देखाईएको थियो।
उ दानी थियो कि लोभी थियो,
छिमेकमा घनघोर आगो लाग्दा पनि भरि इनारको पानी उसले पैंचोमा दियो।