काठमाडौं । कलाकारहरु दीपकराज गिरी, दीपाश्री निरौला र निर्माता रोहित अधिकारीले चलचित्रकर्मी कल्याण कोषलाई व्यक्तिगत तर्फबाट एक÷एक लाख रुपैयाँ प्रदान गर्ने भएको कोष संयोजक तथा वरिष्ठ अभिनेत्री वसुन्धरा भुसालले जानकारी दिइन् ।
कोषकी सदस्य समेत रहेकी निर्देशक निरौलाले कलाकारको दायित्व सम्झिएर कोषमा आफ्नै कमाइबाट आर्थिक सहायता दिने निर्णय गरेको बताइन् । यो रकम विपद्मा परेका कलाकारको सहयोगका लागि खर्च हुने उनले बताइन् । सहयोग गर्नु कलाकारको कर्तव्य नै हो । केही हुने बित्तिकै हामीले कल्याणकारी कोषलाई गुहार्छौं,’ दीपाश्रीले भनिन्, ‘यस क्षेत्रमा समर्पित व्यक्तिहरुलाई हामी कोषलाई सहायता गर्न आग्रह पनि गर्छौं ।’
कोषले पछिल्लो समय फिल्मकर्मीको उपचार र वृद्धवृद्धालाई पनि आर्थिक सहायता प्रदान गर्दै आएको छ । कलाकार र प्राविधिकको वस्तुस्थिति हेरेर पैसा दिइएको छ । अभिनेत्री पल्पसा डंगोलको उपचारका लागि २ लाख दिइयो भने क्यान्सर रोगीको स्थिति हेरेर २ देखि ५ लाख रुपैयाँसम्म दिने व्यवस्था पनि छ । अहिले कोषसँग ५ करोड रुपैयाँ मौज्दात छ ।