काठमाडौं । नेपालको इतिहासमा पहिलोपटक बंगलादेशलाई विद्युत् निर्यात हुने भएको छ। नेपाल विद्युत् प्राधिकरण (नेविप्रा) का प्रवक्ता चन्दन घोषका अनुसार आज दिउँसो १२:४५ बजेबाट ४० मेगावाट विद्युत् बंगलादेशमा पठाइनेछ। भारतको केन्द्रीय विद्युत् नियमन आयोग (सीईआरसी) बाट अनुमति पाएपछि यस प्रक्रिया सम्भव भएको हो। नेपाल, बंगलादेश, र भारतका तर्फबाट संयुक्त रुपमा हस्ताक्षर गरिएको सम्झौताअनुसार भारतको विद्युतीय प्रसारण प्रणाली प्रयोग गरेर विद्युत् बंगलादेशमा पुर्याइनेछ।
नेपालले बंगलादेशलाई विद्युत् निर्यात गर्दा प्रतियुनिट ८ रुपैयाँ ६४ पैसा (६.४ अमेरिकी सेन्ट) मूल्य निर्धारण गरिएको छ। यो कदमले नेपालको ऊर्जा क्षेत्रमा ठूलो फड्को मारेको छ, किनकि यसअघि नेपालले विद्युत् खपतका लागि वर्षौंसम्म आयातमै निर्भर रहँदै आएको थियो। नेपालमा हाइड्रोपावरको सम्भावना थुप्रै वर्षदेखि रहे पनि पर्याप्त लगानी, प्राविधिक पहुँच, र विदेशमा निर्यातको मार्ग नखुलेका कारण देशले ऊर्जा क्षेत्रमा कमजोर अवस्था व्यहोरिरहेको थियो।
पछिल्ला केही वर्षमा नेपालले जलविद्युत् क्षेत्रमा ठूलै सफलता हासिल गर्दै आएको छ। भारतलाई विद्युत् निर्यात गर्न थालेपछि नेपालले ऊर्जा निर्यातको रणनीति बलियो बनाउँदै बंगलादेशसम्म विस्तार गरेको हो। ऊर्जा निर्यातबाट नेपालले विदेशी मुद्रा संचित गर्न सक्ने र आफ्नो ऊर्जा क्षेत्रमा अझै लगानी गर्न सहजता ल्याउन सक्ने अपेक्षा गरिएको छ।
नेपालको जलविद्युत् विकास र निर्यात योजनाले क्षेत्रीय ऊर्जा व्यापारमा थप नयाँ अवसर र सहयोगको ढोका खोल्ने देखिन्छ।