नेपाल प्रिमियर लिग (NPL) को एलिमिनेटर खेलमा कर्णाली याक्सले चितवन राइनोजलाई २१ रनले हरायाे ।किर्तिपुरमा आज सम्पन्न नेपाल प्रिमियर लिग (NPL) को एलिमिनेटर खेलमा कर्णाली याक्सले चितवन राइनोजलाई २१ रनले पराजित गरेको छ।
चितवन राइनोजले टस जितेर पहिले बलिङ गर्ने निर्णय गरे। कर्णाली याक्सले निर्धारित २० ओभरमा ६ विकेट गुमाउँदै १७५ रनको प्रतिस्पर्धात्मक स्कोर खडा गर्यो। कर्णालीका लागि जयकिशन कोलसावालाले ३९ बलमा ५३ रन र विलियम बोसिस्टोले ३९ बलमा ५२ रनको महत्वपूर्ण योगदान दिए। चितवनका बलर सोहेल तनवीरले २ विकेट लिए।
१७६ रनको लक्ष्य पछ्याउने क्रममा चितवन राइनोजले २० ओभरमा ९ विकेट गुमाउँदै १५४ रन मात्र बनाउन सक्यो। चितवनका लागि रवि बोपाराले ३४ बलमा ५३ रनको उत्कृष्ट इनिङ्स खेले पनि टोलीलाई जित दिलाउन पर्याप्त भएन। कर्णालीका बलर जीशान मकसूदले ४ ओभरमा २६ रन खर्चेर ३ विकेट लिए।
यस जितसँगै कर्णाली याक्सले क्वालिफायर २ मा स्थान सुरक्षित गरेको छ, जहाँ उनीहरूले फाइनल प्रवेशका लागि प्रतिस्पर्धा गर्नेछन्।