काठमाडौं, पुस ८ – वरिष्ठ क्रान्तिकारी नेता, पत्रकार तथा साहित्यकार मनऋषि धितालले सामाजिक सञ्जालमार्फत नेपाली अभिभावकहरूलाई आफ्ना सन्तानलाई अस्ट्रेलियामा पठाउँदा ध्यान दिनुपर्ने महत्वपूर्ण सुझाव दिएका छन्। उनले हालै अस्ट्रेलियामा भएका दुइ फरक घटनाको उदाहरण दिँदै, यस्ता घटनाबाट पाठ सिक्नुपर्ने बताएका छन्।
सुखद उदाहरण: उद्धारको सफल प्रयास
केही महिनाअघि मेलबर्नमा बस्ने एक नेपाली किशोर डेरा बिहीन अवस्थामा पार्कमा अलपत्र परेका थिए। तत्कालीन नेपाली महाबाणिज्यदूत चन्द्र योञ्जनको सहयोगमा ती किशोरलाई होटेलमा राखी नेपाल फर्काइएको थियो। अहिले उनी नेपालमा आफ्ना बाबुआमासँग खुसीपूर्वक बसिरहेका छन्।
दुखद घटना: समयमै कदम नचाल्दा जीवन गुमाउनु पर्यो
तर, सबै उद्धार प्रयास सुखद हुन सक्दैनन्। केही हप्ता अघि सिड्नीमा एक किशोरले आत्महत्या गरेपछि नेपाली समुदाय शोकमग्न बनेको छ। ती किशोरले मानसिक स्वास्थ्य समस्या झेलिरहेका थिए। प्रहरी र अदालतको सिफारिसमा उनलाई आफन्तको जिम्मा लगाइए पनि नेपाल फर्काउन ढिलाइ हुँदा उनले ज्यान गुमाए।
सन्देश र आग्रह
धितालले अभिभावकलाई अस्ट्रेलियामा सन्तान पठाउनुअघि ध्यान दिनुपर्ने कुराहरू औंल्याएका छन्:
- जीवन सीप सिकाएर मात्र पठाउनुहोस्: किशोर किशोरीलाई आधारभूत जीवन सीप सिकाउनुपर्ने र उनीहरूलाई आर्थिक बोझ नथोपर्ने आग्रह।
- अध्ययनलाई प्राथमिकता दिन प्रेरित गर्नुहोस्: अध्ययन गर्न पठाएका सन्तानलाई पढाइमै ध्यान दिन दिनुपर्छ, कामको दबाब दिनु हुँदैन।
- मानसिक स्वास्थ्यको ख्याल गर्नुहोस्: सधैं सम्पर्कमा रहँदै, स्वास्थ्य र पढाइको अवस्था बुझ्ने बानी बसाल्नुपर्छ।
- प्लस टू पछि तत्कालै विदेश नपठाउन सुझाव: कम्तिमा स्नातक पूरा गरेपछि मात्र सन्तानलाई विदेश पठाउने सोच बनाउन अभिभावकलाई आग्रह गरिएको छ।
दुखद घटना प्रतिको श्रद्धाञ्जली
धितालले मृत किशोरलाई श्रद्धाञ्जली व्यक्त गर्दै, उद्धार प्रयासमा संलग्न वरिष्ठ कानुन व्यवसायी डा. शमशेर सिंह थापा, सामाजिक अभियन्ता अनिल पोखरेल र महाबाणिज्यदूत संजीव शर्मालगायत सबैलाई धन्यवाद दिएका छन्।
पत्रकार तथा साहित्यकार धितालले नेपाली समाजमा वैदेशिक शिक्षाको नाममा किशोर किशोरीले भोग्नुपर्ने समस्याहरूलाई गम्भीरतापूर्वक लिन अपिल गरेका छन्। उनले आफ्ना सन्देशमा “किशोरको जीवन बचाउन हामी सबै जिम्मेवार छौं” भन्दै अभिभावक र समुदायलाई सचेत रहन आग्रह गरेका छन्।
