काठमाडौं, १४ पुस: प्रधानमन्त्री केपी शर्मा ओलीले विद्यार्थीलाई शान्तिपूर्ण, सम्मानित, समृद्ध र सुखी नेपाल निर्माण गर्न आफ्नो ज्ञानलाई व्यवहारमा उतार्न आग्रह गर्नुभएको छ। त्रिभुवन विश्वविद्यालयको ५० औँ दीक्षान्त समारोहलाई हिजो राजधानीको दशरथ रंगशालामा सम्बोधन गर्दै प्रधानमन्त्री ओलीले विद्वान हुँ भन्ने घमण्ड नगरी समाजलाई सुसंस्कृत र लोकतान्त्रिक बनाउने दिशामा लाग्न आह्वान गर्नुभयो।
प्रधानमन्त्री ओलीले उपाधिले मात्र अध्ययनको अन्त्य नहुने उल्लेख गर्दै ज्ञानलाई व्यवहारिक जीवनमा प्रयोग गर्न आवश्यक रहेको बताउनुभयो। उहाँले भन्नुभयो, “हामीले मुलुकलाई गरिबीमुक्त गर्दै ‘समृद्ध नेपाल, सुखी नेपाली’ को लक्ष्य हासिल गर्न सबैजना लाग्नुपर्छ।”
उहाँले नेपाललाई ज्ञान, ध्यान, योग र संस्कृतिको भूमि भनेर स्मरण गर्दै पूर्खाको ज्ञान र सीपप्रति कृतज्ञ हुने र तिनबाट सिक्नुपर्ने कुरामा जोड दिनुभयो।
समारोहमा विभिन्न तह र संकायका १४ हजार तीन सय आठ विद्यार्थीलाई दीक्षित गरियो। दीक्षान्त समारोहका प्रमुख अतिथि अर्थशास्त्री डा. रामप्रकाश यादवले संघर्ष र इमानदारिताको बाटो पछ्याउँदा सफलता अवश्य प्राप्त हुने बताउनुभयो।
सहकुलपति एवं शिक्षामन्त्री विद्या भट्टराईले शिक्षण र सिकाइ प्रक्रियामा प्रविधिको उपयोग बढाउनुपर्ने आवश्यकता औंल्याउनुभयो। त्यस्तै, त्रिभुवन विश्वविद्यालयका उपकुलपति प्रा. डा. केशरजंग बरालले विश्वविद्यालयका क्याम्पसहरूलाई गाभ्ने नीतिलाई कार्यान्वयनमा ल्याउने योजना सार्वजनिक गर्नुभयो।
प्रधानमन्त्री ओलीले २० प्रतिशतमा रहेको मुलुकको निरपेक्ष गरिबीलाई हटाउन विद्यार्थीको ज्ञान, लगनशीलता र निष्ठाको योगदान महत्वपूर्ण हुने उल्लेख गर्दै आगामी दिनमा मुलुक समृद्धिको यात्रामा अगाडि बढ्ने विश्वास व्यक्त गर्नुभयो।
समारोहमा दीक्षित विद्यार्थीहरूले आफूले हासिल गरेको ज्ञानलाई व्यवहारमा लागू गर्दै समाज परिवर्तनका लागि योगदान दिने प्रतिबद्धता जनाएका छन्।