काठमाडौं । नेकपा एकीकृत समाजवादीका महासचिव घनश्याम भुसालले महासचिव भुसालले आजको संकटको समाधान वामपन्थीले दिने भए पनि एमाले र माओवादीबाट सम्भव नभएकाले नेकपा एसको भूमिका निर्णायक रहेको दाबी गरेका छन् ।
उनले नेकपा एसले लिएको बाटोमा माओवादी र एमाले आउनैपर्ने भन्दै उनीहरू घमण्ड र हिनताबोधले नेकपा एसमा नआए पनि अन्तिममा आउनैपर्ने बताए ।
नेपालको गणतन्त्र अब यसैगरी धेरै समय नचल्ने उनले दाबी गरेका छन् । समाजवादी प्रेस संगठनको दोस्रो राष्ट्रिय भेलालाई सम्बोधन गर्दै महासचिव भुसालले देशमा केही न केही हुने निश्चित रहेको बताए ।
भुसालले भने, ‘आगामी दिन सत्ता फासिस्ट हुँदै जानेछ । सडक अराजक हुँदै जानेछ । यी दुवै कुरा समाधान होइनन् । कमरेडहरू ! यतिकै यो गणतन्त्र चल्दैन, चल्दैन र चल्दैन । केही न केही हुनेवाला छ । आजको व्यवस्थापनले यो गणतन्त्र थाम्दैन, कि क्रान्तिकारी हस्तक्षेपले ठिक बाटो लिन्छ कि यो मुलुकका नागरिकले धेरै ठूलो क्षति व्यहोर्नुपर्ने छ । त्यसैले अब हामीले हस्तक्षेप गर्ने बेला आयो ।’ भुसालले भने ।