डोमिनिकन गणराज्यको राजधानी सान्तो डोमिङ्गोस्थित जेट सेट नाइट क्लबमा मंगलबार बिहान १:०० बजे छत खस्दा कम्तीमा ९८ जनाको मृत्यु भएको छ भने १५० भन्दा बढी घाइते भएका छन्। घटनाको समयमा चर्चित मेरेंगे गायक रुबी पेरेजको सांगीतिक कार्यक्रम चलिरहेको थियो। पेरेजको मृत्यु भएको पुष्टि भएको छ।
मृतकमध्ये पूर्व बेसबल खेलाडी ओक्टाभियो डोटेल र टोनी ब्लान्को, साथै मोन्टे क्रिस्टी प्रान्तकी गर्भनर नेल्सी क्रुज रहेका छन्।
घाइतेहरूको उद्धारका लागि स्थानीय उद्धार टोलीहरू, दमकल, प्रहरी, र स्वास्थ्यकर्मीहरू परिचालित भएका छन्। अहिलेसम्म १५५ भन्दा बढी व्यक्तिहरूलाई अस्पतालमा भर्ना गरिएको छ।
राष्ट्रपति लुइस अबिनेडरले घटनाप्रति गहिरो दुःख व्यक्त गर्दै तीन दिने राष्ट्रिय शोक घोषणा गरेका छन्।
जेट सेट नाइट क्लब सन् १९७३ मा स्थापना भएको थियो र सान्तो डोमिङ्गोको एक प्रतिष्ठित मनोरञ्जन स्थल मानिन्छ। सन् २०२३ मा क्लबको पावर प्लान्ट क्षेत्रमा चट्याङ पर्दा सानो आगलागी भएको थियो, जसमा कुनै ठूलो क्षति भएको थिएन।
छत खस्ने कारणबारे हालसम्म कुनै आधिकारिक जानकारी प्राप्त नभए पनि घटनाको विस्तृत अनुसन्धान भइरहेको छ। यस दुर्घटनाले डोमिनिकन गणराज्यमा भवन संरचनाको सुरक्षाप्रति गम्भीर प्रश्न उठाएको छ।