काठमाडौँ । सङ्घीय संसदअन्तर्गत प्रतिनिधि सभाको पूर्वाधार विकास समितिका सदस्यहरूले ललितपुरको ग्वार्कोस्थित फ्लाई ओभरको स्थलगत अनुगमन गरेका छन् ।
समितिका सभापति दीपकबहादुर सिंहको संयोजकत्वमा समितिका सदस्यहरूले बुधवार फ्लाई ओभरको स्थलगत अनुगमन गरेका हुन् । सो अवसरमा समितिका सभापति सिंहले पहिलो पटक निर्माण भएकोले यसलाई सकारात्मक सोच्नुपर्ने बताए ।
उनले जामलाई व्यवस्थित र नियन्त्रण गर्न एउटा मात्रै फ्लाई ओभरले नपुग्ने बताउँदै १७/१८ ठाउँमा बताउनुपर्ने बताए । उनले फ्लाई ओभर ब्रिजमाथि जाम नभए पनि तल्लो सडकमा जाम हुने जिकिर गर्दै त्यसको नियन्त्रणको लागि पनि नीति बनाएर काम सुरु गर्नुपर्नेमा जोड दिए ।
उनले भने ‘यदि जामलाई केही हदसम्म कन्ट्रोल गर्ने हो भने एउटाले मात्रै पुग्दैन, १५–१७ वटा ठाउँमा फ्लाई ओभर ब्रिज बनाउन जरुरी छ । फ्लाई ओभर ब्रिजमाथि जाम हुँदैन । यहाँ भन्दा तल त जाम नै जाम छ नि । त्यसलाई पनि एउटा चाँडो भन्दा चाँडो पोलिसी बनाएर काम सुरु गर्नुपर्छ ।’
स्थलगत अनुगमनका क्रममा नेकपा ९एमाले०का सांसद ठाकुरप्रसाद गैरेले फ्लाई ओभर आफैँमा नयाँ प्रोजेक्ट भएकोले निर्धारित बजेट मै सम्पन्न हुनु सुखद् पक्ष भएको बताए । उनले ट्राफिक लाइट र दुर्घटना न्यूनीकरणको लागि सिसिटिभी क्यामेरा जडान लगायतका प्राविधिक हिसाबले यात्रालाई सुरक्षित बनाउन सरकारले ध्यान दिनुपर्ने बताए ।
उनले फ्लाई ओभरसँगै यसको दायाँबायाँबाट हुने यात्रालाई सुरक्षित बनाउन सुरक्षा मापदण्डको खोजी हुने भएकोले त्यसमा सरकारले गम्भीर रूपमा ध्यान दिनुपर्नेमा जोड दिए ।
उनले भने ‘एउटा त यो फ्लाई ओभर आफैँमा नयाँ प्रोजेक्ट हो । त्यसमाथि पनि यो जुन रूपमा निर्धारण गरिएको थियो, त्यही रूपमा सम्पन्न भयो भनेपछि यो आयोजनाका हिसाबले सुखद पक्ष हो, म यसप्रति खुसी व्यक्त गर्छु । यसमा ट्राफिक लाइट, दुर्घटना न्यूनीकरणको लागि सिसिटिभी क्यामेरा जडान गर्ने हिसाबले लगायतका अन्य प्राविधिक हिसाबले यो फ्लाई ओभरबाट गरिने यात्रालाई सुरक्षित बनाउने र सँगै साइडबाट हुने यात्रालाई सुरक्षित बनाउनको लागि त्यसको सुरक्षा मापदण्डको खोजी गर्छ । त्यसमा सरकारको अझ बढी ध्यान जानु आवश्यक छ ।’
२०७८ फागुनमा ओभर पास निर्माण दुई वर्षभित्र सक्ने गरी सुरु गरिए पनि पटक–पटक म्याद थप र निर्माणको डिजाइन नै परिवर्तन गरी ३९ महिनामा फ्लाई ओभरको निर्माण सम्पन्न भएको हो । उक्त फ्लाई ओभरको आगामी शुक्रवार प्रधानमन्त्री केपी शर्मा ओलीले उद्घाटन गर्ने कार्य तालिका रहेको छ ।