झापामा लगातारको वर्षापछि आएको बाढीले हजारौं किसानको धानबाली बगाइदियो। ७०३ कृषकको करिब पाँच करोड ७५ लाख रुपैयाँ बराबरको धान नष्ट हुँदा बिचल्लीमा परेका किसान अहिले राहत र पुनःपुनर्जीवनको बाटो खोजिरहेका छन्।
झापा। यही असोज १८ देखि २० गतेसम्म परेको अविरल वर्षापछि आएको बाढीले झापामा ४६३ दशमलव ४२ हेक्टर जमिनको धानबाली नष्ट गरेको छ।
कृषि ज्ञान कार्यालयका प्रमुख सागर विष्टका अनुसार, बाढीले ७०३ कृषकको रु पाँच करोड ७५ लाख २३ हजार बराबरको १,६४४ दशमलव ३ मेट्रिक टन धान नष्ट गरेको छ।
उनले भने , “बाढीले अन्य कृषिबालीमा पनि क्षति पुर्याएको छ, तर धानमा आएको क्षति सबैभन्दा बढी छ। पाक्न लागेको धान बगाउँदा किसानको स्थिति अत्यन्तै नाजुक भएको छ।” वर्षाका कारण कनकाई र विरिङ नदीमा आएको बाढीले सबैभन्दा धेरै धान खेत बगाएको छ।
बाढीले गौरीगञ्ज, झापा गाउँपालिका, भद्रपुर, कनकाई, शिवसताक्षी र गौरादह नगरपालिकामा पाँच हजार १२ दशमलव ६३ हेक्टर जमिनमा कृषिजन्य वस्तु बगाएको छ। अन्य पालिकाको तुलनामा झापा गाउँपालिकामा सबैभन्दा धेरै क्षति भएको छ। विशेषतः वडा नं १, २ र ३ का ४३१ किसानको करिब पाँच करोड १४ लाख ४७ हजार रुपैयाँ बराबरको धान, आलु र केरा बाढीले नष्ट भएको छ। तस्बिर : एआई