काठमाडौं। नेपालका लागि अमेरिकी राजदूत र्याण्डी डब्लु बेरीले नेकपा (माओवादी केन्द्र) का अध्यक्ष पुष्पकमल दाहालसँग भेटवार्ता गर्नुभएकाे छ।
आज (बुधबार) दाहाल निवास खुमलटार पुगेर राजदूत बेरीले बिदाई भेटवार्ता गर्नुभएकाे हाे । आफ्नो कार्यकाल सकेर राजदूत बेरी स्वदेश फर्किनुअघि राजनीतिक दलका नेताहरुसँग विदाई भेटवार्ता शुरु गर्नुभएकाे हाे। राजदूत बेरी र दाहालबीचको भेटवार्तामा दाहालले राजदूत बेरीको सफल कार्यकालको लागि बधाई दिनुभएकाे थियाे ।
अध्यक्ष दाहालको सचिवालयद्वारा जारी विज्ञप्तिमा भनिएकाे छ, ‘अध्यक्ष कमरेड प्रचण्ड र नेपालका लागि अमेरिकी राजदूत महामहिम रेन्डी बेरीबीच आज बिहान अध्यक्ष निवास खुमलटारमा बिदाई भेट भयो। अध्यक्ष कमरेड प्रचण्डले राजदूत बेरिको सफल कार्यकालको लागि हार्दिक बधाई दिनुको साथै नेपालको विकास र समृद्धिको बाटोमा अमेरिकाको निरन्तर सहयोगको लागि धन्यवाद व्यक्त गर्नुभयो।’