काठमाडौं । काठमाडौंको कान्तिपुर सिटी कलेजका बीबीएका विद्यार्थीहरुले प्रकाशन गरेको जर्नल ‘स्कुलर्स’ को हालै विमोचन गरिएको छ ।
नेपाल उद्योग वाणिज्य महासंघकी पूर्वअध्यक्ष भवानी राणाको प्रमुख आतिथ्यतामा सम्पन्न कार्यक्रममा राणासहितका अन्य अतिथिहरुले जर्नलको विमोचन गरेका हुन् । बीबीए सन् २०२० को व्याचले प्रकाशन गरेको १० औं संस्करणको पुस्तकको चर्चा गर्दै अतिथिहरुले पुस्तकले धेरैजसो विषयवस्तु समेटेको भन्दै प्रशंसा गरे । जर्नलमा कृषि, पर्यटन, उर्जा, सूचना प्रविधिलगायतका विभिन्न विषयका लेख रचनाहरु समेटिएका छन् । प्रमुख अतिथि राणाले पुस्तकमा समेटिएका प्रत्येक विषयले सकारात्मक सोचको पैदा गर्ने बताइन् । उनले पुस्तक केबल पुस्तकको आकारमा मात्र नभएको र सबैजसो सामग्रीले मानिसमा एक प्रकारको उत्साह पैदा गर्ने बताइन् । उनले आजका विद्यार्थीहरुले भोलिका दिनमा विभिन्न क्षेत्रको नेतृत्व गर्ने हुँदा विद्यार्थीहरुमा त्यो क्षमता देखिएको भन्दै विद्यार्थीको प्रशंसा गरिन् ।
कान्तिपुर सिटी कलेजका क्याम्पस प्रमुख राजु कट्टेलले कलेजले विद्यार्थीहरुलाई औपचारिक अध्ययनका साथै व्यवहारिक ज्ञान पनि प्रदान गर्दै आएको बताए । ‘क्याम्पसले कोर्षमा आधारित रहेर पढाउने काम त गरिहाल्छ त्योभन्दा अगाडि बढेर विद्यार्थीकेन्द्रित व्यवहारिक र व्यवसायिक सीप दिने कुरामा पनि सक्रिय छौं’ उनले भने ‘यो बेला जर्नल प्रकाशन गर्नु चुनौती थियो तर पनि विद्यार्थीले त्यसलाई सामना गरेका छन्, यो बेलामा पनि ४० भन्दा बढी विज्ञापन संकलन गर्नु चानचुने कुरा होइन ।’ उनले सामग्री संकलनका क्रममा कतिपय ठाउँ पुगेका विद्यार्थीलाई सम्बन्धित संस्थाले जागिर दिने भनेको सुन्दा आफूलाई खुशी लागेको बताए । उनले विद्यार्थीको अतिरिक्त क्रियाकलापका लागि क्याम्पसले जस्तोसुकै सहयोग गर्ने पनि प्रतिबद्धता जनाए ।
विद्यार्थीहरु रोम भुसाल र मेलिना राई संयोजक भएर प्रकाशन गरेको पुस्तकमा विद्यार्थीसहित विज्ञका लेखहरु समावेश गरिएका छन् । जर्नलका बारेमा बोल्दै अतिथिहरुले सामग्री संकलन र व्यवस्थापनको प्रशंसा गरेका थिए । जर्नलमा पूर्वाञ्चल विश्वविद्यालयका उपकुलपति प्रा.डा. विजुकुमार थपलिया, क्याम्पसका प्रबन्ध निर्देशक डा. प्रल्हाद कार्की, क्याम्पस प्रमुख कट्टेल, सहायक क्याम्पस प्रमुख भानुभक्त निरौला, अपरेसन कोअर्डिनेटर मिना खत्री, पत्रकारिता विभागका उपप्रमुख तथा क्याम्पसका प्रमुख प्रशासक राजिव तिमल्सिना, अध्यापक दीपकविक्रम थापा क्षेत्री, बीबीए संयोजक पुजा पोखरेललगायतले शुभकामना दिएका छन् ।
कार्यक्रमकी प्रमुख अतिथि राणाले नेपालमा जुनसुकै क्षेत्रको पनि राम्रो सम्भावना भएको भए पनि सरकार र निजी क्षेत्रले त्यसलाई प्रोत्साहन गर्न नसकेको गुनासो गरिन् । उनले अध्ययनका लागि विदेश गएका विद्यार्र्थीले पनि नेपाल फर्केर आएर केही गरेर देखाउनुपर्नेमा जोड दिइन् ।
२५ वर्षअघि स्थापित कान्तिपुर सिटी कलेजले सन् २००८ देखि बीबीए सञ्चालन गर्दै आएको छ । पूर्वाञ्चल विश्वविद्यालयबाट सम्बन्धनप्राप्त यस क्याम्पसले बीई सिभिल, बीई कम्प्युटर, बीआइटी, बीसीए, बीबीए, बेचलर इन आर्टिफिसियल इन्टेलिजेन्स, पीजीडीसीए, एम्सीए, एम्एमसिजे अध्यापन गराउँदै आएको छ ।
क्याम्पसका प्रबन्ध निर्देशक डा. प्रल्हाद कार्कीले समयको माग अनुसार क्याम्पसले नयाँ विषय थप गर्दै आएको बताए । उनले अन्तर्राष्ट्रिय बजारसम्म प्रतिस्पर्धा गर्न सक्ने जनशक्ति उत्पादन गर्नु अहिलेको आवश्यकता रहेको जनाएका छन् । उनले क्याम्पसले विद्यार्थीका लागि उपयुक्त शैक्षिक वातावरण बनाइरहेको र व्यवहारिक शिक्षामा बढी जोड दिँदै आएको पनि स्पष्ट पारेका छन् ।