जाडोयाम सुरु भएपछि तापक्रम तीव्र रूपमा झर्छ र शरीरलाई न्यानो रहन अतिरिक्त ऊर्जा खर्च गर्नुपर्छ। यही कारणले प्रतिरक्षा प्रणाली कमजोर बन्छ र खोकी, रुघाखोकी तथा अन्य मौसमी रोगहरू सहजै लाग्न सक्छन्। यस मौसममा खानपान र बानीमा सानो सचेतताले ठूलो समस्या टार्न सक्छ।
भारत नोएडाको सुपर स्पेशलिटी अस्पतालका वरिष्ठ सल्लाहकार डा. प्रखर गर्गका अनुसार जाडोमा शरीरलाई भित्री रूपमा न्यानो राख्ने र रोग प्रतिरोधात्मक क्षमता बढाउने केही प्रभावकारी उपायहरू अपनाउन सके बिरामी पर्ने सम्भावना निकै घट्छ।
बिहान मनतातो पानीबाट दिन सुरु गर्नुहोस्:
मनतातो पानीमा कागती वा थोरै गुड मिसाई पिउनाले घाँटी सफा हुन्छ र प्रतिरक्षा शक्ति बलियो बन्छ। भिटामिन–सी युक्त अमला, सुन्तला, अम्बा, कागती जस्ता फलफूल पनि जाडोमा अत्यन्त लाभदायक मानिन्छन्।
प्रोटिनयुक्त खाना अनिवार्य बनाउनुहोस्:
हरेक भोजनमा प्रोटिन समावेश गरिनुपर्छ। अण्डा, दही, चीज, दाल, अंकुर, कुखुरा जस्ता स्रोतबाट प्राप्त प्रोटिनले टी–कोशिकालाई बलियो बनाउँछ, जसले शरीरलाई रोगसँग लड्न सक्षम बनाउँछ।स्वस्थ बोसो युक्त खानाले शरीरलाई न्यानो राख्छ
घिउ, तिल, बदाम, ओखर जस्ता स्वस्थ चिल्लो पदार्थहरूले शरीरलाई तातो राख्नुका साथै जोर्नीको कडापन कम गर्छन्। घरमै बनाइएका तिल–गुडका लड्डु जाडोमा विशेष उपयोगी हुन्छन्।
बेसार र मसलाले सूजन र संक्रमण रोक्छ:
बेसारमा रहेको करक्यूमिन सूजन कम गर्ने प्राकृतिक तत्व हो। साँझ बेसारको दूध वा अदुवा–तुलसीको चिया पिउनाले शरीरलाई आराम दिन्छ र रोगबाट बचाउँछ। अदुवा, कालो मरिच, तुलसी र लसुनले पाचन सुदृढ बनाउँछन्।
चिसोमा पनि पर्याप्त पानी पिउनु अनिवार्य:
जाडोमा तिर्खा कम लागे पनि शरीरलाई हाइड्रेटेड राख्नुपर्छ। तातो सुप, हर्बल चिया र मनतातो पानी उत्तम विकल्प हुन्, जसले रक्तसंचार सुधार गर्छ।
डा. गर्गका अनुसार मौसमी फलफूल–तरकारी, सम्पूर्ण अन्न, प्रोटिन र स्वस्थ बोसो सहितको सन्तुलित आहार तथा दिनमा कम्तीमा ३० मिनेट शारीरिक गतिविधिले जाडोमा बारम्बार बिरामी पर्नबाट बचाउँछ।